Filozofia jonë

Mbi 98 milionë njerëz janë detyruar të braktisin shtëpitë e tyre dhe gjenden në këto çaste larg vendit të tyre. Pra janë emigrantë. Një shifër e paparë, as pas Luftës së Dytë Botërore. Shumica janë gra dhe fëmijë. Ata i ikin luftës, konflikteve, varfërisë, korrupsionit dhe shkojnë drejt një jete më të mirë. Mbërrijnë në vende ku fliten gjuhë të tjera, ku ka të tjera kode komunikimi. 
Një lëvizje njerëzore që nuk ka rreshtur kurrë. Sepse padrejtësitë, por edhe shpresa, nuk kanë rreshtur kurrë. 

-Identifikimi i nevojave për informim i emigrantëve nga vende jashtë BE-së në Francë

  -Zbulim i burimeve zyrtare dhe të besueshme të të dhënave dhe drejtim i emigrantëve drejt tyre

  -Përkthimi i këtyre të dhënave në tre gjuhë të rëndësishme për emigrantët dhe përshtatja në një formë të thjeshtë e miqësore

Shqiptarët përbëjnë një nga grupimet më të mëdha të emigrantëve në Nancy dhe më tej në Grand-Est. Eshtë ende një komunitet i ri. Ndaj është ende i varfër, nuk flet gjerësisht frëngjisht, i pakoordinuar mes anëtarëve të vet dhe me një nivel të lartë papunësie e mungese informimi. Sipas raporteve zyrtare të OFPRA, shqiptarët nga Shqipëria janë ata që kanë aplikuar për azil më shpesh (vendin e parë) në Francë në 2017 (7 630 kërkesa. Ata okupuan vendet e dyta në 2018 (8 261 kërkesa) dhe 2019 ((8 023 kërkesa). Me një histori disi më të vjetër në Francë, shqiptarët e Kosovës gjithashtu kanë figuruar në mesin e kërkuesve më të shpeshtë të azilit për vite me radhë. 

Bashkimi Europian dhe Franca i konsiderojnë Shqipërinë dhe Kosovën si vende të sigurta dhe demokratike ndaj, kërkesat për azil të shqiptarëve që vijnë nga këto dy vende, refuzohen në shkallë të gjerë. Por, kërkimi i azilit zë vendin kryesor mes kërkesave të shqiptarëve në Francë (duhet patur parasysh edhe që politika zyrtare e kësaj të fundit nuk është e hapur ndaj punësimit të të huajve jashtë BE-së). Gjithë ky gërshetim arsyesh, ka sjellë që mijëra shqiptarë, zakonisht të rinj ose familje të reja, të mbërritur sidomos në 5-10 vitet e fundit, të mbeten të parregulluar zyrtarisht dhe mënjanë jetës në Francë. Ata nuk kanë akses në të drejtat dhe shërbimet që mund të marrin me ligj sepse nuk kuptojnë gjuhën dhe kjo i bën të izolohen edhe më tej. Edhe në rastin më të mirë, për atë pjesë tashmë të ligjëruar, izolimi nga informimi ngelet një e vërtetë e madhe sepse, siç shpjegohet më lart, bëhet fjalë për një komunitet të ri emigrantësh, që nuk ka patur kohë dhe mundësi ta njohë e përdorë frëngjishten. 

Eshtë një publik larg informacionit.  

Informim i shpejtë dhe i thjeshtë në shqip, anglisht, frëngjisht dhe zbutje e gjuhës së urrejtjes online 

Filozofia jonë është e thjeshtë; të thyejmë muret e komunikimit. Të jemi solidarë. Të ndërtojmë një komunikim ndihmues, praktik, profesional. Në mënyrë që emigrantët të mund të kuptojnë të drejtat e tyre, por edhe rregullat dhe ligjet franceze. Në mënyrë që emigrantë e vendas të mund të njihen. Duke shkrirë kështu akuj të kotë e duke zbrazur energji negative po aq të kota nga të dyja krahët.

 Shumë nga informacionet që do t’u lehtësonin jetën, formimin profesional apo edukimin, mbërrijnë në veshët e tyre shkarazi, të paplota, madje të deformuara sepse oferta e komunikimit në shqip mungon.